حساسية شمس !!

السلام عليكم ورحمة الله وبركاته

اولا بعتذر لجميع من وعدتهم ببعض التدوينات عن بعض النقاط التى ارادوا توضيحها ولكنى معذور بسبب عينى ( اه ياعينى ) .

طبعا الجميع بيقول ايه ده ؟ وايه العنوان الغريب ده ؟!!

نرجع ورا شوية ونوصل لآخر عام فى الدراسة بالنسبة ليا وانا فى الفرقة الرابعة بكلية الهندسة - قسم اتصالات والكترونيات , وبالتحديد فى شهرى 6 و 7 حيث الامتحانات وايضا مشروع التخرج بعد الامتحانات والسفر فى عز الظهر وطبعا الشمس فى مصر بقالها سنتين كل سنة بتزيد حرارة عن السنة اللى قبلها ( ربنا يكون فى عون اخواتنا فى شبة الجزيرة العربية ) , وفجأة لقيت عينى وجعتنى واحمرت واللى بوظ الدنيا اكتر كتر قعدتى قدام شاشة الكمبيوتر ( ادى اللى بناخده من العلم :) ) , فقولت يمكن من الكمبيوتر او حاجة فبطلت الجلوس عليه فترة صغيرة ( كام يوم يعنى ) وبعدين لقيت الوجع والاحمرار بيزيدوا فروحت اكشف لقيت الدكتور بيقولى عندك حساسية من الشمس . 

ايه ؟؟ حساسية من الشمس !!!!! قولتله يعنى ايه ؟ قالى انت بتمشى فى الشمس كتير وهى الشمس اصبحت حامية جدا فقولتله اه لأنى بضطر اسافر للكلية علشان مشروع التخرج ( ادى اللى اخدناه من الكلية والتعليم :) ) . ومكانش عندى اصلا الحساسية دى بس هى حصلتلى بقى وطبعا الحمد لله على كل شىء .

المهم جبت قطرة ومرهم والاتنين سعرهم حوالى 50 جنيه مصرى ( قال ايه غاليه علشان مستوردة !! ) .

والحمد لله اتحسنت بعدها بمدة .

نرجع بقى للسنة دى وتقريبا من اسبوع ونص وبدأت الاعراض دى تظهر تانى بس المرة دى اصعب شوية ولازم ابص للسقف كل شوية علشان الزغللة تروح واحمرار خفيف كده قولت يمكن من الكمبيوتر ( مبحرمش ولا بتعظ :) ) فبطلت اقعد عليه الى ساعات قليلة فى اليوم وطبعا الامر زاد سوء وادور على الروشتة بتاعة الكشف الاول وملقتهاش فروحت جبت قطرة مشهورة للحساسية ويعنى الحمد لله بدأت التحسن شوية بس حاسس انى غالبا هاروح اكشف تانى ( مع انى مش بخرج من البيت نهائى ولا بمشى فى الشمس بس تقريبا الحر الشديد اللى موجود دلوقتى مأثر وقايم بالواجب معايا :) هو كمان والله اعلم ).

فياريت تعذرونى انى مش بكتب تدوينات اليومين دول لأنى مش بقعد كتير على الجهاز وتقريبا مش بقعد خالص منذ اسبوع  الا ربع ساعة كل كام يوم .

ملحوظة كده على السريع ::::: 

الواحد مشغول حاليا بالتحضير لـ CCNA لأنى للاسف اضطريت احول تخصصى من اتصالات خلوية الى شبكات بعدما لم اجد اى وظيفة فى هذا التخصص ( وبينى وبينكم ندمت انى اتعمقت وضيعت مش اقل من 3 سنين فى هذا المجال اللى هو الاتصالات الخلوية لأنه للاسف ملهوش اى لازمة فى الوطن العربى ككل الا بقى لو ليك واسطة تشتغل فيه فى شركات متخصصة فيه وهى اصلا قليلة ومش بتطلب مهندسين الا كل فترة كبيرة وفى السر من الآخر :) ) .

ملحوظة صغننة برضه :::::

انا هاكمل دروس فى مجال الاتصالات الخلوية ومش معنى انى هاكمل فى الشبكات انى هاسيب الاتصالات او هانساها او هاترك الكتابة فى المجال ده .

هاكمل الدروس ان شاء الله وهاكمل دروس الفيديو وانا عارف ان فى ناس كتير زعلانة منى علشان مكملتش لسه دروس الفيديو بس والله الظروف بجد مأخرانى انى اعمل اى حاجة وعلشان برضه الناس مش تقلق فانا زى ماقولت سابقا اننى مش مجبر انى اضع اى دروس ولكنى وضعت هذه المدونة ووضعت هذه الشروحات سواء نظرية او فيديو ابتغاء مرضاة الله عز وجل ( واخدت عهد انى لن اقبل باى شىء يأتيى من وراء هذه الدروس ) لأنى لم اضعها لمصلحتى ولكنى وضعتها لمصلحة المسلمين العرب فى كل مايهتم به مجال الاتصالات لأن لا يوجد فى سماء المحتوى العربى فى مجال الاتصالات الى القليل جدا وبالتالى كان يجب اثراء هذا المحتوى حتى يستفيد الجميع ان شاء الله سواء كان قادرا ان ياخذ كورسات بفلوس او غير قادر فانا دائما مع اميل الى المصادر المفتوحة والمجانية ولا اعترف ان العلم والبرمجة بأن تكون غير مجانية ولكن يجب نشر العلم بدون انتظار اى مقابل ولذلك نصحنى البعض باعطاء كورسات خاصة فى الاتصالات والبرمجة ولكنى ارفض تماما ولكنى اريد ان اساعد اى اخ عربى سواء داخل مصر او خارجها وبدون اى مقابل .

واقبلوا اعتذارى عن تقصيرى مرة اخرى .

وارجو الدعاء لى بالهداية والمغفرة من الله عز وجل .

السلام عليكم ورحمة الله وبركاته